【A&M Diary】天后出名多嘢食，由街頭行到街尾，次次都花多眼亂，唔知食咩好呢！今日M佬就話同我去居酒屋，食吓串燒，感受一吓日本嘅氣氛。我哋就嚟到黑木亭居酒屋，餐廳地方唔大，牆身大大幅嘅壁畫，加埋唔同嘅小擺設，都有幾分大和風㗎。
蟹將軍薯仔沙律
薯仔沙律有粒又有蓉，所以食落好有口感。加上有絲絲蟹肉同蟹籽，錦上添花，好有層次。
廣島蠔
廣島蠔串燒都係第一次食，燒嘅時間控制得好好，非常鮮甜。
免治雞肉棒
免治雞肉加雞軟骨嘅配搭，口感好豐富。醬汁當然係蛋黃汁配豉油，同免治雞肉棒好match。
白鱔
鱔肉燒到塊皮脆卜卜，魚肉無骨，無腥澀，正。
鴛鴦翠玉瓜
翠玉瓜就咁燒就食過，但呢度加上蒜蓉同明太子再燒，好特別有心思，有驚喜！
燒雞翼
雞翼醃得入味，燒到個皮夠乾脆，keep到肉汁，好juicy。
厚燒牛舌
牛舌嘅牛味香濃，加少少鹽吊味，味道已經夠出。
京蔥雞肉串
呢個串燒嘅主角就梗係唔係雞肉啦，因為京蔥真係好好味㗎！蔥味香濃，味道帶甜，配埋雞肉一齊食就最夾。
脆燒豆腐
外脆內綿，估唔到豆腐都可以咁好味。
