【A&M Diary】M佬揸住1064帶我去到深水埗，佢話要幫佢深層清潔喎，清潔時間需要大概4個鐘。喺等待嘅時間，我哋就喺深水埗四圍行吓，了解舊香港嘅味道。四圍行4個鐘都唔係辦法，所以我哋決定慢慢嘆個打邊爐。嚟到老百姓火鍋刺身，打邊爐嘅同時仲有期間限定優惠，每位再送大閘蟹一隻添，好開心呀！
大閘蟹
一落完order，店員就話每位會送一隻大閘蟹。嘩！好開心呀！大閘蟹係公蟹，大小適中，加上今年嘅大閘蟹質素都唔錯，蟹膏好鮮甜又細膩，濃郁嘅蟹味，一隻真係唔夠呀！
滋潤百姓湯
湯底選擇相當多，我哋就揀咗呢到嘅招牌湯底：滋潤百姓湯。湯底用原隻雞、花膠、螺頭同哈蜜瓜煲成，開始打邊爐前就梗係要飲啖湯先。講真，我哋都係第一次飲用哈蜜瓜煲嘅湯，原來好香甜㗎，加上雞湯嘅濃郁，味道好有層次。仲有大量花膠同螺頭，夠晒足料。
美國頂級肥牛
肥牛薄切，輕輕一淥就食得，細味一吓香濃嘅牛肉香味，肉質夠晒鮮嫩。
牛脷花
牛脷整到成朵花咁，份量好多，同樣牛味香濃，爽口彈牙。
珊瑚蚌
珊瑚蚌好新鮮，輕輕一淥就食得，好彈牙。
