【A&M Diary】被稱為銅鑼灣後花園嘅大坑，中、日、西、泰、越、星馬菜等等嘅特色食店都有。雖然依家嘅大坑比以前失色唔少，但都有唔少人氣排隊熱店，例如呢間喺街邊嘅炳記茶檔，賣點係鐵皮屋大排檔風味，每次weekend經過，都會大排長龍，所以我哋特登平日嚟，試吓佢嘅嘢食同埋奶茶啦！
豬扒煎蛋麵
呢度嘅食物款式貴精不貴多，而作為大排檔又點少得公仔麵呢！老闆用自家秘方將豬扒醃過夜，所以豬扒帶有濃郁嘅黑椒味，夠晒juicy惹味。而為咗食得方便，所以細心切件上枱。至於雞蛋就略為過熟，想食蛋黃嘅，記住轉做太陽蛋喇！A姐就話欣賞佢加上幾條菜，感覺健康少少喎。最後，記住加埋枱面嘅麻油，即刻味道層次double up！
凍奶茶
大排檔嘅精髓又點少得奶茶呢？凍奶茶嘅茶味香濃，奶又夠滑，夏天飲番杯，夠晒解渴。以飲得凍奶茶，提議你唔好叫少甜，咁先飲得出佢完美嘅奶同茶嘅比例！
