【A&M Diary】今日M佬帶我遊車河，既然去得遊車河就梗係去啲交通相對無咁方便嘅地方，所以我哋今日揀咗去深井！深井沿路嘅風景好靚，雖然無咩景點，但勝在有遠近馳名嘅燒鵝，啱晒為食嘅我哋！呢度都有好幾間燒鵝餐廳，今日就隨意咁揀咗深井陳記燒鵝海鮮酒家。
燒鵝瀨
兩個人叫半隻燒鵝，好似有啲誇張，所以我哋簡簡單單，一人一碗燒鵝瀨。其中一碗嘅燒鵝更加係鵝髀位置添！鵝嘅皮夠晒香脆，而上枱嘅第一時間，當然就係將鵝肉夾開，費事畀湯浸到啲皮淋晒。燒鵝唔算太肥，卻充滿油香，肉質嫩滑，好好味。
酸梅醬
每碗燒鵝瀨都配上酸梅醬，真係見到梅核同梅肉，但我哋就略嫌甜咗啲。
