【A&M Diary】唔知全香港你最鍾意邊個區呢？我哋最鍾意就係中西區，除咗充滿舊香港特色，如果喺啲老街細心慢步，仲有機會發掘到唔少驚喜。我哋今日自駕遊去到堅尼地城同西環一帶，除咗食好西，仲順路去埋人氣打卡熱點：西環鐘聲泳棚。
西環泳棚建於60至70年代，由於當時泳池尚未普及，所以就喺海邊搭建一座永久性嘅竹棚，方便泳客游水。而西環泳棚更加係香港現時僅存嘅泳棚。
老一輩嘅，當然對泳棚充滿感情，當日我哋都見到有唔少嘅市民暢游維港；而年青嘅一輩，對呢到嘅認識，當然就因為呢度係熱門嘅拍照景點啦！
由堅尼地城港鐵站出發，行大概15分鐘，就會到達泳棚嘅入口。落大概100級嘅樓梯，就會到達泳棚嘅平台，假日嘅時候會有好多外籍人士喺度野餐。泳棚上嘅木橋延伸海面上，最佳嘅拍攝時間當然係日落嘅靚景啦，但要留意每一日嘅漲潮同退潮時間喇！因為現場冇救生員，所以我哋都唔建議大家喺呢度游水喇。
