【now.com生活】喜劇嘅世界，通常會有一個演員做上靶，另一個負責做下靶，由於笑點同反應都係下靶較誇張，所以好多時都係做下靶嘅喜劇演員容易搶鏡。
不過，調返轉嚟睇，如果本身係上靶角色，喺擁有高智慧，咩難題都可以解決嘅情況下，仍然有能力惹觀眾發笑，嗰個演員嘅演技先係真正高，而據我觀察，江華前輩就係呢種上靶喜劇演員。
江華搞笑，就係人都知，但唔知大家有冇察覺，佢喺劇裡，幾乎未做過傻仔角色，做嘅大多係皇帝、智囊、神仙等位高權重角色，就算喺《西遊記》呢個極少角色有正常造型嘅劇裡，佢都係做最官仔骨骨嘅唐三藏，雖然佢唔使扮鬼扮馬，但偏偏《西遊記》中最令觀眾刻骨銘心嘅角色，就係唐三藏。呢個或多或少同江華嘅表情及行為舉止入型入格之餘，仲有一種特別嘅喜感有關。
我自己極喜歡江華喺《九五至尊》嘅演繹，呢套劇講雍正畀水龍捲捲咗去現代嘅香港，憑智慧同權術手段將辦工室問題解決，慢慢上位。本來，如果純粹劇本，本應該冇咩好笑，因為對白冇特別GAG位，故事亦同普通穿越劇冇分別，簡單嚟講，情況同大製作《尋秦記》完全唔同，但係當你見到江華著住西裝大搖大擺咁扮皇帝行路，同埋佢自信滿滿招招積積嘅樣，就會忍唔住笑出嚟。
喺觀眾眼中，做戲如若做上靶做忠角就係著數，但其實做下靶做奸角反而更好，因為發揮大好多，同埋容易引起觀眾情緒，換言之，做戲做上靶其實更難，難得江華前輩做上靶都咁好笑，實在令我相當佩服。
文：專家Dickson
（小弟毛記電視專家Dickson，至今追女仍然食塵。見到女神自覺好襯，幻想世界感覺好親，點知佢話我有病要求診，搞到我傷心要把情史……痛陳。同道中人聽完打冷震，覺得好Pure又好真，自此執筆去行文，篇篇酸爆篇篇甘。）
FB：https://www.facebook.com/expertdickson
〈獨的酸言〉逢周一刊登
專欄屬作者個人意見，不代表本網立場
