【now.com生活】從來未試過拍拖嘅單身者，只能從朋友嘅經歷去認識愛情。
唔知係咪物以類聚，同我較熟嘅朋友們嘅愛情路都頗崎嶇，一係女友惡過乜，少少事黑面，一係就另一半敵不過沉悶生活，跟咗第三者。所以坦言，我對愛情係有啲啲驚。
直至早幾日，我參加咗一個婚禮，睇到一單小插曲，又有另一個想法。話說婚禮司儀係新娘子嘅閨蜜，讀讀吓親友感言時，感動到喊咗出嚟，講唔落去，佢當下就諗起男友喺現場，所以叫佢出嚟撐自己，佢話︰「我一見到佢，唔知點解，就會忍唔住笑。」結果，佢男友真係行出嚟，面對全場賓客，女司儀講一句，佢就搞Gag扮做手語翻譯，場面極為浪漫。
究竟點解要有另一半？原因可以有好多。浪漫主義者通常提倡︰「咪就係因為大家鍾意大家，所以喺埋一齊。」的而且確，聽落好合理，但愛嘅感覺，其實好兒戲，我哋都不得不承認，鍾意嘅感覺係有可能隨住時光流逝而磨滅，咁點算？所以話，雙方可以繼續落去，一定有其他嘢維繫，其中一種，可能係對方為你做嘅所有好事集合而成嘅感情。
小時候，有套電視劇叫《聊齋》，當中有個單元故事叫《狐仙報恩》，台灣女星余小凡飾演嘅小翠為母報恩，下嫁傻小子元豐，處處為佢著想，後來當元豐唔再傻，醫返好了，小翠決定離開，仲搵咗個靚女陪佢，但元豐唔肯，非小翠不愛。
愛情好似搖搖板，若然有一方落力，另一方一定要回應，搖搖板先可以取得平衡。若果小翠為元豐著想，但元豐不為小翠著想，愛情就不能延續。
因此，當你發覺你嘅另一半為你設想時，請不要當作理所當然，亦唔好做一個只接受別人好意，卻一點都不肯施予嘅人。
獨的格言︰任何關係，都要有來有往先有意思，如果只有單方面付出，只會落得兩個下場，一係佢乾塘，一係追你數。
文：專家Dickson
（小弟毛記電視專家Dickson，至今追女仍然食塵。見到女神自覺好襯，幻想世界感覺好親，點知佢話我有病要求診，搞到我傷心要把情史……痛陳。同道中人聽完打冷震，覺得好Pure又好真，自此執筆去行文，篇篇酸爆篇篇甘。）
FB：https://www.facebook.com/expertdickson
〈獨的酸言〉逢周一刊登
專欄屬作者個人意見，不代表本網立場
