【now.com生活】大學畢業後，我有段時間喺中學做教學助理，兼教幾班低Form中史。可能我天生似一個樹窿，當時無論男男女女，老師或者學生，都喜歡問我愛情問題。
真實嘅校園愛情故事，並唔係電影或電視劇咁浪漫，「A君鍾意B君好耐然後由於一次意外終於願意表白」呢啲劇情，無論係我做學生嘅時候，定係做老師嘅時候，亦甚少遇見。一啲涉及人性黑暗面嘅愛情事件，我反而見唔少，其中一個狀況，實在令我震驚。
話說當年教過一班中一小朋友，有個女仔（稱為A）上學期嘅時候，同班上嘅B君拍拖，但係好快就分咗手，然後又同班上嘅另一個男仔C君拍拖，跟住又分咗手，再同班上嘅D君喺埋一齊，而B、C、D君又係朋友關係。我唔知道呢種情況喺其他男女校係咪常見現象，但我聽到，第一時間就諗︰一個人點可能接受到自己前女友同班裡面咁多個人拍過拖，而且有啲仲要係搭膊頭嘅兄弟？
可能我個人比較老土，由我發情以來，已經有一套規則，其中一條係「一個圈子，只會追求一個人。」原因係，若然喺同一圈子追求兩個女仔，隨時會引申不必要嘅問題，如下︰
1. 如果你同時喺一個圈子追兩個女仔，佢哋極可能私下傾起你，咁就出事。
2. 如果你追A唔成功又去追B，B就會覺得你當佢係替代品，明明對你有嘢，都唔會咁易同你一齊。
3. 如果追A唔成功，追B又唔成功，再去追C，明明你咩都得唔到，但整個圈子都會覺得你濫。
基於上述原因，我一直堅守原則，儘管呢個原則會引伸另一個問題，就係A君唔鍾意你，你喺呢個圈子就從此同愛情絕緣，但你仍然可以以一個情深嘅姿態，喺呢個圈子存活下去，等待同呢個圈子無關嘅緣分。
獨的格言︰賤男同毒男，若然兩者必定要揀其中，寧毒莫賤，保存名聲，總有人會欣賞你。
文：專家Dickson
（小弟毛記電視專家Dickson，至今追女仍然食塵。見到女神自覺好襯，幻想世界感覺好親，點知佢話我有病要求診，搞到我傷心要把情史……痛陳。同道中人聽完打冷震，覺得好Pure又好真，自此執筆去行文，篇篇酸爆篇篇甘。）
FB：https://www.facebook.com/expertdickson
〈獨的酸言〉逢周一刊登
專欄屬作者個人意見，不代表本網立場
