【now.com生活】除非你有吳彥祖嘅樣貌，又或者蔡加讚嘅身家，如果唔係，喺一般情況下，你遇到幾男同時追一女嘅機率，必定比幾女同時追你嘅機率高。
出現呢個極不Fair嘅狀況，或多或少同女仔喺愛情路上大多被動有關，即係話，當你以為「無人親近我，無人爭奪我」嘅時候，其實可能（縱使係1%）有女仔暗戀緊你，只不過佢哋冇衝動到向你表白，又或者係啲暗示唔夠明顯，又或者係啲暗示非常明顯，但你戇居居Get唔到。
男仔向女仔表達愛意嘅方法，雖然各有不同，但就算幾唔明顯，都是很易看穿的，而其中一個較為大路嘅準則，就係對異性態度嘅好或壞，同佢與該異性嘅關係不相符，即係佢同該異性本身唔多熟，但卻對人異常地好，或者異常地差，前者以為「落力為你好」得L到分數，後者則非常相信「不是冤家不聚頭」。無論點，只要該異性唔自欺欺人，唔將呢堆「好」當成「朋友嘅好」，通常都會發現男仔嘅愛意。
反而女仔若然鍾意一個男仔，究竟會點樣暗示呢？呢層我確係唔太清楚。我試過從電視劇嘅情節搵答案，亦曾經以為女仔同男仔一樣，鍾意一個人會對佢特別好，又或者特登同佢鬥嘴，引佢注意，結果到表白嘅時候，對方都會嚇一跳，先係回應︰「我估唔到你會鍾意我。」繼而補一句︰「對唔住，我唔知會令你誤會。」
在下雖然唔敢自稱為名偵探柯南，但估嘢亦有返兩度散手，偏偏次次估錯女孩子嘅心意，落得撞到頭破血流嘅下場，只能慨嘆一句︰「女仔難估過馬仔。」
文：專家Dickson
（小弟毛記電視專家Dickson，至今追女仍然食塵。見到女神自覺好襯，幻想世界感覺好親，點知佢話我有病要求診，搞到我傷心要把情史……痛陳。同道中人聽完打冷震，覺得好Pure又好真，自此執筆去行文，篇篇酸爆篇篇甘。）
FB：https://www.facebook.com/expertdickson
〈獨的酸言〉逢周一刊登
專欄屬作者個人意見，不代表本網立場
