【now.com】讀唔同科目嘅人，有唔同嘅嗜好。我做馬經時，就有個同事讀會計出生。佢每場賽事都會列出一條公式，然後計計。後來佢冇做呢行，但習慣未改，縱使玩手機嘅小遊戲，也要設計一條算式出嚟，計一計先過癮。
至於讀中文出生嘅我，總喜歡將生活浪漫化。做好多喺別人眼中多此一舉，但又非常滿足一己私欲嘅行為，而寫情信就係最常見例子。
現實世界，情書絕對係效率低又費氣力嘅產物，因為大部分人表達愛意，都會選擇拖對方嘅手、擁抱對方，再唔係加一句「我愛你」，再唔敏感嘅人，都會明白發生咩事。何需花心機寫咁多字去表達三個字講晒嘅嘢？偏偏，我對情書卻有種癖好，每逢寫完，就好似為對方付出好多好多咁，所以有段時間，我會自行寫情信畀心儀對象。
由於未將別人追到手，而我本身又唔太煽情，所以當時嘅情信，內容大多圍繞日常生活發生嘅事去寫，有時會將同心儀對象齊齊經歷嘅嘢，用文字重寫一遍，講下自己嘅感受，有時又會寫啲童話故事，氹對方開心。
我試過為回信嘅女孩寫信，又試過為無論收幾多封信都堅決唔回嘅女孩寫信，亦試過默默將情書寄去外國，然後喺Facebook收到女孩兩句「我收到喇！多謝你！」
最初，我會期待對方回信，但後來發現就算對方唔回信，我落筆嘅時候同樣快慰，原來喺不知不覺間，我已經變成為取悅自己而寫情信，換個角度，又可以稱為給自己的情書……
近年因為工事有點忙，又因為欠缺一個寫信嘅對象，所以一段長時間冇寫情信，直至剛才搭小巴見到日落，心中泛起一點浪漫嘅感覺，先記得那些年忙於寫情信的日子，格外懷念。
獨的格言︰為咗感動人而寫嘅情書，通常感動唔到人，因為心機太重；為咗感動自己而寫嘅情書，才是最感動的。
文：專家Dickson
（小弟毛記電視專家Dickson，至今追女仍然食塵。見到女神自覺好襯，幻想世界感覺好親，點知佢話我有病要求診，搞到我傷心要把情史……痛陳。同道中人聽完打冷震，覺得好Pure又好真，自此執筆去行文，篇篇酸爆篇篇甘。）
FB：https://www.facebook.com/expertdickson
〈獨的酸言〉逢周一刊登
專欄屬作者個人意見，不代表本網立場
