【now.com】記得細個嗰陣，我有一個愛情理論，叫「駁橋理論」。意思係愛情不論明戀、暗戀、單戀、雙戀，若果失戀，最佳方法就係盡快尋找另一個對象，將情感轉投落去，咁就可以忘記受過傷害，就好似一條橋去到盡頭，只要駁上另一條橋，就會柳暗花明又一村。因此，以前我追唔到A，會盡快令自己愛上B，然後追B。追唔到B，又會追C，如此類推。
或者因為咁，我先會遇上22次求愛不遂，變成22道陰影。事實證明，呢個理論只會帶來唔好嘅後果。
推翻咗「駁橋理論」，我嘗試喺追求不遂後，唔立刻愛上第二個人，跟住我就發現，原來呢個世界有樣嘢叫「真空期」。
「真空期」要面對嘅係寂寞，嗰種寂寞，唔係玩樂或者工作可以消解，因為寂寞嘅成因，係心無所住。鍾意人嘅時候，你嘅心思無時無刻放喺對方身上，幾乎一空閒，就會諗起心儀對象，幻想佢做緊咩，幻想佢有冇同時諗起自己等等。縱使唔係情侶，感覺仍然充實。偏偏「真空期」係冇目標好諗，只能回望過去，然後又因為求不得而寂寞。
不過，「真空期」嘅好處就係畀你諗清楚自己想要咩，唔會為咗拍拖盲摸摸去尋找對象，揀咗一個唔係真心鍾意嘅人，又或者接受一時嘅溫暖。同時，亦可以反思一下自己求偶方法有冇問題，唔會因為心急亂咗步伐，明明有機會成功，卻因節奏錯晒而失敗。
我同「真空期」已經很熟絡，算一算，都做咗2年朋友，而對上一次追女仔，已經係2年前嘅事。究竟「真空期」幾時會走？唔知道。上天大人，雖然「真空期」確有優點，不過今次嘅賽後檢討，未免太長了吧……
獨的格言︰真空期的意思是真正的空虛時期，抵得了這種空虛，戰無不勝。
文：專家Dickson
（小弟毛記電視專家Dickson，至今追女仍然食塵。見到女神自覺好襯，幻想世界感覺好親，點知佢話我有病要求診，搞到我傷心要把情史……痛陳。同道中人聽完打冷震，覺得好Pure又好真，自此執筆去行文，篇篇酸爆篇篇甘。）
FB： https://www.facebook.com/expertdickson
〈獨的酸言〉逢周一刊登
專欄屬作者個人意見，不代表本網立場。
