【Now新聞台】截至早上11點，1小時內《彭博》用戶關注度上升最多的港股，依次為特步國際、華潤啤酒、新特能源、騰訊控股及快手。
大市暫時連升第3日，恒指上返28000點，不過，最受《彭博》用戶關注嘅特步就逆市跌，其實噚日已經跌咗5%，半日收市再跌近4%，但其他體育用品股就繼續升。
京華山一國際研究部主管彭偉新指，其實特步冇乜利淡消息，但股價今年已經升咗2倍，喺高位壓力較大，雖然股價跌咗落去，但仲有買盤承接，成交係明顯多咗，所以個價之後應該可以升返上去。佢又話，特步後市甚至有機會上返之前高位，但要留意，如果特步破唔到頂，可能反映升動力進一步減弱。
