【Now新聞台】總結截至早上11點，1小時內彭博用戶關注度上升最多的港股，依次為，農夫山泉、首創置業、華潤啤酒、雅居樂集團及比亞迪股份。
農夫山泉上月一度因為飲品宣傳文宣，令人誤會使用日本福島白桃做原材料，引起爭議兼令股價波動，6月股價要跌14%。踏入七月後原本都冇咩表現，但今日突然有大成交配合，一度抽升逾8%，挑戰今年第二大單日升幅。
圓通環球金融集團行政總裁曾永堅指，自從澄清文宣事件後，市場對農夫山泉嘅評估重回基本面，加上公司嘅盈利增長及現金流強勁，令市場認為佢屬穩打穩紮嘅內需股，所以即使目前其估值並唔算平，仍吸引到唔少人撈底。但佢認為暫時未有其他消息可以再炒高股價，故料股價短期較難突破46.5元。
