【Viu】資深演員Baby寶珮如早前受訪講及拍攝受傷辛酸史，重提拍《藍天白雲》一場同Rachel梁雍婷嘅真·掌摑戲，致半邊面滿佈深紫色瘀傷，隨即引嚟極大迴響！呢日趁電影《一個部門的誕生》首映禮，Baby除咗專程撐「阿女」Rachel，亦為真·掌摑戲現身說法！
Baby表示估唔到件事會有咁多人關注，對Rachel都感到唔好意思，事後有喺多方渠道作澄清！佢又大讚Rachel係位專業嘅演員，加上Baby自認要求高，所以當時就堅持真打！依家再有掌摑戲都嚟真？Baby表示唔會啦，因為當初係唔記得塊面裝有鈦金屬片。Rachel就話依家會有動作指導，當時掌摑完Baby心情都好複雜！
着到一身紅噹噹嘅Fish廖子妤希望電影有好票房，立flag如果票房破8千萬，就着返戲中電視台吉祥物「Happy仔」個look跳舞，Yukki戴玉麒聽到即刻話跟隊！首次擔任電影男一嘅Yukki有冇票房壓力？古天樂首開紅館騷咁大件事，Fish有咩表示？
白只興奮表示可以同Eason陳奕迅拍新戲《不得不好死》，形容直頭好似發夢，每當休息期間都會聽到「行走中嘅CD」Eason哼歌，咁咪免費聽演唱會？唔知白只有冇加把口合唱或者點歌？同時白只心心眼話仲見到兩大女神朱茵、林熙蕾，抵死笑言拍完呢部戲可以退休咁話！
