【Viu】今年第2場拉闊音樂會今日喺商場舉行記者會，宣布主角為Janice衛蘭 x Gigi炎明熹，以「她和她的秘密」為主題，打開佢哋嘅秘密閨房！今次「師徒檔」合作，佢哋都話既激動又期待，Janice大讚徒弟Gigi大個咗、靚咗，提起對上一次唱拉闊係20年前同前老細Leon同台，簡直係時光飛逝！
Gigi上星期有去睇MC x 包包 x Gareth.T嘅拉闊騷取經，笑言知道大家都好想睇佢哋跳舞，maybe會練一練咁話喎！佢哋又透露已經交咗一堆歌篩選，包括係互唱、cover，唔知會唔會出首新嘅合唱歌？Janice、Gigi所講嘅「秘密」尺度大唔大先？喺閨房唱歌會着睡衣？
有指呢個騷係幫助Gigi衝擊女歌手，佢大方表示對獎項冇特別追求，順其自然、隨遇而安！Janice日前同班姊妹參加室內健身賽事Hyrox，佢自爆病住參賽係超級辛苦，之後仲即走飛羅馬，搞到腳震震！另外，佢又透露同Ian@MIRROR飛咗轉意大利公幹，大讚Ian又高又nice，仲趁機叫對方寫歌畀佢添，欲知後事如何，請睇足本訪問！
