【Viu】Gigi炎明熹今晚喺亞博舉行復工後首個個人音樂會《風之旅 My Voyage Goes On Live》，同Gi炎粉一齊過平安夜！是夜嘅rundown幾乎有9成都係cover歌，身穿寶藍色配laces、黑色大蝴蝶結嘅Gigi，喺透紗布升起後現身，先分別cover 金Jer、天后王菲嘅《風靈物語》x《百年孤寂》，以及另一天后Sammi鄭秀文嘅《心魔》，大晒Gi炎粉久違聽到嘅靚聲！Gigi完美駕馭到兩位天后嘅歌，仲要每一舉手投足都勁有台風添，聽到全場集體耳朵「懷孕」呀！
隨後Gigi換過一條白色靚裙，行出T台位置同Gi炎粉打招呼，祝大家平安夜、聖誕節快樂！呢位有禮貌嘅孩子更借時間多謝服裝師，話希望下次可以喺大啲嘅舞台着靚衫畀大家睇！有片有真相呀，期待Gigi快啲找數！之後就唱英文歌《Somewhere Over the Rainbow》，邊唱邊同Gi炎粉揮手派福利！
唱到中段，呢位「火星女孩」繼續同Gi炎粉傾偈，自爆有舖改名癮嘅Gigi，就連自己下巴粒暗瘡都唔放過，就地取材叫「平安」，會唔會太funny？太cute？而當Gigi見到台下有熟人更表現得極興奮，特別係見到班舞台劇嘅buddies，大爆金句「我唔着褲！（我唔在乎！）」，擴大「炎系火星語錄」database！
Gigi又講到本身想搞嘅fans meeting唔係咁，最後變咗自己玩自己，發生咩事呀？聽見台下Gi炎粉係咁撩佢落台玩，自稱變成熟嘅Gigi話依家學識聽方案，真係畀佢笑死！最後又傾唔傾得成？跟住Gigi就唱出林奕匡嘅《高山低谷》啦！
去到encore位，Gigi換咗套牛仔look，喺唱《阿拉斯加海灣》前忍唔住爆喊！另外，歐陽震華、葉巧琳嚟咗睇騷撐Gigi，劉德華、Gin Lee、容祖兒、蘇永康等則送上花籃祝賀！先睇實況片聽歌！
