【Viu】MC張天賦 x CONSTANCE x Gareth.T今晚喺亞博舉行《少於三》拉闊音樂會！呢兩男一女「嬲」字組合一齊登場，打頭陣先唱師妹包包嘅《一律建議分手》！以往拉闊「傳統」都喺尾段先有talk位，呢次唱完第一首歌佢哋三個就同全場觀眾打招呼兼劇透rundown，但其實呢part係MC嘅心意，想大家一齊向緊張到爆嘅包包打氣，呢位師兄堅係sweet！
三人開騷必有小組crossover位，先嚟MC x 包包合唱情歌《老派約會之必要》，唱到最後二人suppose係慢慢互相走近，未知包包係咪怕醜，行到中間笑住調轉頭，笑死！之後仲有MC x Gareth.T首唱合唱歌《金童子》，前奏一起全場即企晒起身，high到爆！二子更搞笑對cam十指緊扣，又勁有默契咁行到台嘅兩邊同fans互動，更不時舞動body添！
至於solo舞台，三位都有cover唔同歌手嘅作品，例如MC揀咗Gareth嘅《笑住喊》、Gareth唱MC嘅《世一》、包包就cover關淑怡嘅經典金曲《難得有情人》，兩位師兄MC、Gareth更全程留喺台度伴舞，扭晒腰咁傍實小師妹，呢單嘢仲唔係勁浪漫超溫馨？
嚟到chit chat環節，MC笑言做騷對住兩位唔多講嘢嘅partner係幾難做，又爆包包喺綵排時着咗對超高嘅高踭鞋，搞到佢唔敢行埋去！被指少說話嘅包包難得唔跟稿問咗Gareth一條問題，令Gareth突然語塞唔識答！講到幫fans改名，包包向fans賜名「堤子包」？最後三人以謝安琪嘅《年度之歌》作結！先睇實況片聽歌！
