【Viu】《農夫香港最好笑嘅演唱會》第二場（10日）繼續驚喜連連，觀眾嗌到聲沙！演出中段，農夫突然請出MC張天賦做神秘嘉賓，三人首度同台合唱《學海無涯》。MC一出場，全場尖叫，佢更全程唔使提詞機，一字不漏完整Rap晒成首歌，連農夫都睇到瞪大眼，全場觀眾拍爛手掌！
唱完之後，農夫笑言邀請MC，因為全香港得佢一個敢叫MC，個名勁Hip Hop！陸永大讚：「大家有冇留意？我真係未見過有嘉賓可以Rap咁多，佢要求唔要提詞機。佢真係識我哋啲歌，我好肯定佢識過你哋。」MC謙虛話因為農夫話唱《學海無涯》，佢就開始背喇，「細個溫書嗰陣，我聽已經係DSE啦，我記得嗰時仲係小學，唔用正途去下載音樂，放入MP3入面聽㗎！你哋係我人生list上面其中一組人，我好希望可以嚟到你哋演唱會做嘉賓。係人都知，我做任何演唱會最緊要一定要提詞機，但今日我覺得你哋啲歌，如果我背唔到，就唔配上嚟做嘉賓！真㗎！所以我今日真係好開心，好少我做嘉賓係冇壓力㗎，呢度真係好歡天喜地。」
演唱會尾聲，正當大家以為《高舉隻手》就完場，農夫自組新公司「農作天下」喺台上舉行「開張大典」。歡呼聲中，佢哋仲請出幕後「白武士」兼老闆古天樂一齊切燒豬！熒幕解釋點解有「天下」兩個字、點解「So far So Cool」有個Cool字，然後請出「國際榮譽霸道總裁」古天樂，古生一出場，全場企起身歡呼，幾乎叫裂紅館！佢大讚觀眾氣氛一流，「我諗呢樣嘢係咁解：乜嘢叫棟篤笑？你哋帶俾佢哋歡樂，佢哋今日棟篤喺度支持你哋。」陸永即笑老闆：「我懷疑你呢段度咗三個禮拜，哈哈......」
C君就話：「拯救一間公司可能要白武士，但投資一間公司就要黑武士。多謝古老闆！老闆你驚唔驚我哋叫你嚟投資，將會係一個世紀大騙局？哈哈.....」古生表示：「多多支持，多多指教，今日香港需要開心歡樂！」之後三人一齊切燒豬，邊講話：「風生水起，笑口常開。日後業務好唔好就唔知，一切交俾天命。」隨後，古生喺農夫半推半就之下戴起耳機，唱出經典金曲《天命最高》。而台下亦星光熠熠，MIRROR嘅AK、Alton、ERROR嘅193同肥仔、Day同Candy@COLLAR、湯令山、洪家豪、Tyson Yoshi等好友都有捧場！
