【Viu】《GRASSHOPPER THREE IN LOVE 草蜢演唱會2026》噚晚第三場，嘉賓係古天樂，4人合唱《天命最高》，嗌爆歌迷喉嚨。其後蔡一智玩即場考古，指古生係草蜢1993年作品《原諒我是我》MV中嘅男主角，3子仲起哄挑機古生即興表演，古生淡定清唱之餘仲領全場大合唱，猛呀！
然後阿智再攞出禮物送俾古生，並話：「知你最近整親隻眼，成日戴眼鏡，但一般眼鏡遮光唔夠好，送一副遮光好勁嘅俾你。」然後攞出一副疑似燒焊工業用嘅綠色眼罩，古生神回：「你哋覺得係燒焊用，我睇到化幻片角色，綠魔人用！」蘇志威另外再送名牌太陽眼鏡，然後古生扮閃人，阿智即笑指：「唔得，你爭我哋三隻唱片，想走？我依家挑你，漏咗隻字，係挑戰你，唱草蜢快歌！」4人走勻四面台再合唱草蜢《好戲在後頭》，正到裂開！
蔡一傑喺獨唱《流淚的背影》、《失樂園》後，又同觀眾分享治療癌症期間遇到嘅感人故事：「有日坐輪椅去到照PET Scan間房，我必須要起身行去張床度。突然一位醫護人員走埋嚟扶我，我話唔使，但佢堅持，我問點解？佢話『你唱嘅歌喺呢幾十年陪我走過高山低谷，你今日呢段路就俾我扶你行。』原來我唱咁耐歌都唔知道，陪住大家走過唔同歲月。相反，你哋何嘗唔係陪住我一齊走過高山低谷呢？」而呢晚觀眾席上，有乳癌復發嘅吳文忻、Tiger@MIRROR、「三哥」苗僑偉同「三嫂」戚美珍、DJ當奴等。想感受台上嘅熱血，快啲入嚟睇片啦！
