【Viu】《夜王》由年初一上畫至今將近兩個月，票房截至4月8日為1億734萬，黃子華、鄭秀文、導演吳煒倫今晚孖住何啟華、李芯駖、廖子妤、盧鎮業、Renci楊偲泳、Mandy譚旻萱及林熙彤等，出動食魚蛋兌現票房過億同埋請大家食魚蛋之約，並即席宣布長達162分鐘導演版將於月中上映，呢個版本尺度3級、加插咗30分鐘從未曝光片段！
今次導演版唔止加返阿Dee同Renci啲戲份，仲加咗之前冇出現、飾演太子峰妹妹Ella嘅Amy Lo盧慧敏嘅戲份！問到電影變3級尺度變好大？吳導話本身版本已好邊緣，而家仲加多咗好多粗口同性感畫面！
而子華神影相時高擧2字，被問到係咪想票房過2億，佢話個手勢代表V姐亦代表夢想，咁如果有2億又有咩福利？佢笑言咁就唔係食魚蛋咁簡單，要加豬皮蘿蔔做大餐！至於7月開個唱嘅Sammi嚟緊要閉關，但都會配合出嚟謝票，子華神即讚佢fit咗，咁Sammi會唔會安排一part俾東日family上台？佢話大家嚟齊梗係開心，但要湊夠人都唔係易事，有人肯嚟已好開心，子華神即答原則上有工作，希望盡量可以去到！Sammi首次有電影獲破億票房，佢話拍戲嘅自信心唔係來自票房，而係來自演出，還到好劇本，不過未試過票房咁高，都好高興！子華神近年齣齣電影都有票房佳績，有傳有人買咗佢啲舊戲再上映，佢話有聽過但唔知有幾成真！
阿Dee話派魚蛋係子華神發起，今次真係找數真漢子，Renci聽見即話唔敢亂講嘢，原來啲嘢會成真！咁如果2億票房點算？Dee笑言要搞火箭升空，再同NASA合作！知唔知導演版會唔會加返Dee同Renci嘅蒜蓉白菜仔之吻？Renci講笑話可能盒白菜仔會出現，Dee又話可能有埋4D會有埋蒜蓉味出現，又話有蒜蓉白菜謝票場，笑C！
芯駖話要配音關係都睇咗少少導演版，聽導演講最精彩係opening，好似另一套戲咁，會懷疑入錯戲院！Mandy就話導演同佢講啲粗口加返晒落去添！快啲睇足本訪問啦！
