【Viu】等足五年終於等到「登神」合體啦！Anson Lo盧瀚霆同Edan呂爵安首度一齊喺澳門開騷，唔單止唱到跳爆舞台，仲喺台上大放笑彈同洋蔥，由頭high到尾。一開場，兩位就獻上久違嘅合體舞台，唱出《霸道總裁》同埋《Hey Hey OK!》令全場尖叫聲震天。之後阿撈深情演繹《Gimme Gimme》、《你都有今日》、《Burn Out》同新歌《本命》，而Edan就送上《My Apple Pie》同首唱新歌《左手拖右手》，各自晒出獨特魅力。
去到Talking環節，Edan拎住咪感觸又帶點搞笑咁話：「回想返上次真係咁樣合作嘅表演，或者一連串嘅rundown，已經係五年前嘅YouTube live。所以全靠呢個單位嘅成功主辦，俾我哋有呢個機會喺五年後再做一個咁新嘅表演。我相信我哋嗰陣時都冇諗過會有呢個show、呢個rundown出現。」佢隨即話：「衷心感激，亦都多謝你哋咁耐以嚟一直咁支持我哋。無論係點樣認識我哋、點樣留意到我哋又好，鍾意我又好，鍾意阿撈又好，你哋今日都入嚟支持我哋，呢個絕對要多謝你哋。因為呢啲付出唔係必然㗎，你哋選擇呢個假期，冒住風雨，搭會暈嘅船過嚟，所以多謝你哋！希望我哋都會繼續成長，繼續努力，大家一齊見證我哋嘅進步。」
輪到Anson Lo分享排舞過程：「好多謝大家期待咗咁耐，希望我哋今日呢個歌單係大家鍾意。其實都幾好玩，因為好似好耐都冇試過我哋兩個人合作。除咗五年前之外，我哋就要返去《全民造星》第二季一齊跳《Killers》。喺呢個show嘅rundown或者排舞上嘅走位，所有嘢我哋都有俾過好多意見。好多謝我哋排舞師，同埋所有dancers朋友，仲有台前幕後、台底所有工作人員。」最後佢哋帶動全場大合唱《突如其來的心跳感覺》，「田牧CP」回憶返晒嚟！
