【Viu】MIRROR官方歌迷會主辦嘅《Hi MIRO! Garden Party 2026》今日繼續驚喜連連，輪到Ian陳卓賢出場，佢化身「四眼賢」，一嚟就行勻全場送上《DWBF》，搞到全場Hellosss即刻進入瘋狂狀態，之後仲獻唱最新個人單曲《花邊細胞》冧Fans！
到粉絲問答環節，有粉絲問佢有冇試過寫歌俾有精神病情緒病嘅人，Ian即刻認真mode上身，話其實有一首新歌佢嚟緊會出，仲話自己好多歌都想傳達正能量：「唔係避開唔開心嘢，而係遇到困難，困難每日都會發生，心態最緊要。」並透露未出嘅《在遠方的你》其實係寫俾自己內心嘅「小靈魂」，希望大家聽完可以放鬆幾分鐘。
到咗送禮環節，Ian精心準備嘅第一份禮物係麻糬，第二份係佢出場前會食嘅喉糖，第三份係簽名相，第四份就係佢錄歌時嘅手稿，真係勁有心思！
MC「旁白君」文卓森問如果歐洲有個大草地搞活動會想搞咩，Ian竟然答：「結婚，史上最大型嘅婚禮。」跟住仲話：「大家靜靜地坐低，唔准講嘢，坐佢兩三日。」仲話中間有嘢食亦可以去廁所，但係要「寧靜過寧靜海」。最搞笑係之後佢哋真係玩「五秒寧靜」，全場望住Ian唔講嘢，Ian自己都話：「大家都市人節奏好快，冇乜時間靜靜哋。」旁白君問佢有冇興趣玩發呆大賽，Ian即刻答：「我日日都玩緊。」仲自嘲：「因為冇見人，儲咗少少social energy，大概有6分鐘左右。」
最後全場一齊玩「許願拋氣球」，將大家吹漲嘅氣球一次過掟向Ian，場面壯觀又歡樂！個個Hellosss都吹到臉紅耳熱，最後掉嗰吓全場氣球滿天飛，奇蹟係一個氣球都冇整爆過！連Ian都忍唔住讚：「其實大家啲肺活量都好犀利！」佢又稱：「多謝大家一路睇住我、陪住我做我想做嘅嘢，我嘅音樂有咗大家去聽，先賦予到意義。」
片段來源：讀者提供
