【Viu】現年88歲嘅魚毛余慕蓮，自從年前因病入ICU搶救後，久未公開露面，今晚專誠扮靚靚為Louie賈思樂演唱會做嘉賓，雖然要坐輪椅，但依然精靈，現場觀眾亦齊齊大叫：「加油！余慕蓮！」令魚毛姐感動到眼濕濕！魚毛姐先喺台上多謝各位善長人翁，又談笑風生話自己專做醜女係貪競爭少，其後Louie送上《Pretty Woman》畀魚毛姐，仲錫手仔兼面珠，巧有愛呀！
魚毛姐受訪時話好開心再見返一班觀眾，可惜自己之前中過肺炎有後遺症而唱唔到歌，仲搞Gag話：「唔夠氣，我冇你咁好氣！」魚毛姐又話呢排身體唔錯，經常行公園保健，仲會約朋友打台灣牌健腦兼打牙骹，早排仲孖朱咪咪同「順嫂」梁葆貞食飯，見返一班老朋友超開心咁話！對於獲Louie讚靚女，魚毛姐搞笑話：「靚過囉！」
而Louie就分享邀請魚毛姐做嘉賓嘅過程，仲話見到對方眼濕濕，所以刻意搞笑令對方唔好喊，仲自認係「康樂組組長」，新年一定會約魚毛姐打台灣牌，更揚言唔會鬆章畀前輩！想知Louie嘅新年大計，有冇打算叫三哥「科水」畀自己同華哥開騷呢？睇足本訪問就知啦！
