【Viu】今日舉行嘅壓軸《Hi MIRO! 見面祭2025》係「Ianson」Ian、Anson Kong孖住上陣，夠晒開心！Ianson喺熱身game《你願意嗎？》 ，主持旁白君負責問呢對「老Best」情景題，對於願唔願意一齊住，兩個人同時話唔想，AK話依家想要私人時間，Ian就話自己鍾意整齊、乾淨、對傢俬有研究。AK就爆以往大家試過夾份租studio嘅情況：「件傢俬一嘢就畀我開爛咗」，Ian補充：「我話你小心啲整，佢話得㗎喇，一嘢就整爛咗個梳化，我就知道佢會咁樣。」之後，Ian又回想起有次被AK搞到個編曲冇咗。
至於被問到對方願唔願意即興去旅行，佢哋係好sure對方會陪自己，並話想一人租一架車自駕、分房瞓，好好享受。到唱歌時間，Ian首唱新歌《給千億顆星選中的二人》，真係冧爆Hellosss喇！AK就帶嚟《Love is on the way》 ，老闆型爆！
好快就到中秋，Ianson仲進行中秋燈籠亮燈儀式，再同全場fans們大合照，大家都齊齊拎住燈籠，勁有feel！之後，Ian、AK輪流做動作同估答案，fans們喺台下幫手答，好搞笑！最後，Ianson深情合唱《蝸牛》，係正嘅！仲唔快啲入嚟睇現場實況片感受兩兄弟嘅愛！
