【Viu】《陳慧琳Season 2萬人結界演唱會》噚晚第5場，嘉賓係張敬軒，二人心有靈犀同著粉色系，再拖手合唱《風花雪》。軒公又不禁食Kelly「豆腐」，笑稱對方係女神，大讚佢美麗動人，又喪問Kelly點做到零皺紋。Kelly笑答：「真係好少事可以令我嬲。」
專程報恩嘅軒公，表示每次自己開演唱會請Kelly任嘉賓，佢都非常支持，更搞笑話：「以前做後輩歌手嘅嘉賓，總聽到一句話，今晚終於輪到我講——『我細細個就聽你嘅歌大！』喺後台聽到你嘅每首歌都好感動，多謝你同雷頌德創作咗咁多好聽嘅歌，陪伴我同好多觀眾度過人生中嘅黃金時代。」 想一齊感動，仲唔入嚟睇現場實況片！
