【Viu】Kaho洪嘉豪噚晚帶病上陣，踏上澳門最大舞台舉行佢嘅首個外地演唱會，幸好未有影響演出，順利完成！個唱流程同香港站相約，有額外加唱新歌《跟你分擔失落比較快樂》兼對上一隻大碟入面嘅hidden song《離永遠只差一點》，果然係識冧院友！
喺唱《黑玻璃》嗰陣，Kaho照板煮碗出動愛車FL5，成功連人帶車搬上澳門舞台！雖然Kaho騷前講過呢次會封小蠻腰，但喺歌衫上都有surprise，六套入面有五套都係新做㗎！就連舞台設計都有level up，台嘅兩邊各有一條延伸至場中嘅天橋，可以畀院長邊唱邊同院友近距離互動同selfie，佢話見到好多遠道而嚟嘅院友都好感動！
期間Kaho指最近因病食足一個月藥，喺呢段日子有新嘅體會、學識欣賞自己：「喺係最壞嘅時侯，我嘗試換轉角度諗都幾好，可以喺演唱會前免疫咗，所以好想大家生活中，不能話好偉大要擁抱任何唔好嘅事情，但換個角度可能你會有得著！」又承認因唱歌冇天份，所以會更努力、更重視每個演出！
鑑於Kaho喺紅館騷哭成淚人，佢噚晚再三提醒自己唔可以再犯，並開心share「紅館哭了」佢係有幾咁後悔：「上次男人流淚，一直喺心耿耿於懷，覺得明明一個好好機會，話畀人知我做到，但果次又衰咗，導致『創傷後遺症』，上次紅館啲片我真係冇咩睇過，今晚克服到再唱一次係咪值得畀掌聲！」
另外，適逢今個月26日就係院長嘅生日，噚晚共9000位院友為Kaho準備小驚喜，仲齊齊唱生日歌同切蛋糕，極有愛呀！而臨完騷前，Kaho喺唱最後一首歌《洗面》嗰陣，都係忍唔住爆喊多謝院友，二度破功，唔知院長嘅「創傷後遺症」有冇變嚴重咗呢？喺度亦預祝院長26號生日快樂！
