【Viu】Mira Place年度音樂盛事「Gimme LiVe音樂節」又嚟啦！頭場有Kaho洪嘉豪、Beanies、LEWSZ、Novel Friday、Sherman潘靜文，輪住以靚聲俘虜fans嘅耳仔！
壓軸出場嘅Kaho已經係第3次參加「Gimme LiVe音樂節」，瞬間變做師兄，對住「高」過佢嘅師弟LEWSZ，抵死唔敢行近，誠實自爆「離地」都唔夠LEWSZ嚟！
Kaho除咗唱《黑玻璃》之外，仲首唱新歌《拜託》，事後佢笑話喺台上發生一件小插曲，搞到佢忍唔住笑咗出嚟！第一次喺商場演出嘅LEWSZ，不停話好緊張，有早啲嚟商場視察環境，唔知佢有冇向師兄Kaho取經？幾時可以聽到呢對師兄弟合唱《原來我的好不夠好》？
講到Kaho打入上半年YouTube香港地區熱門藝人榜2024嘅頭10位，佢話好開心可以有第9位嘅成績，希望今年喺頒獎禮上攞到男歌手獎！數據上，見Kaho僅次喺韓國女天團BlackPink之下，同愛團有咁「近距離」接觸，佢有冇小鹿亂撞？
首次參加「Gimme LiVe音樂節」嘅Beanies，話平時都會嚟Mira Place shopping，釗彤自爆之前有以fans身份嚟過睇石山街演出，估唔到依家變咗表演者企上個台！Beanies知呢次可以近距離接觸到fans，各自準備咗啲同fans互動嘅招數，真係勁寵粉呀！
提到成員Kay喺出發台灣拍新歌《小氣簿》MV前，唔小心拗柴，佢報平安指差唔多好番晒，仲自爆有個朵「Kay婆婆」，係有咩意思嘅呢？Beanies預告今年除咗會繼續派團歌之外，五女仲會分別出solo歌！另外，即將生日嘅Jaime，今年會點同男朋友仔ANSONBEAN sweet住過？
