【Now.com】鄭秀文Sammi噚晚 (23日) 舉行紅館演唱會第九場,請嚟近期憑住大熱電影《九龍城寨之圍城》人氣直線爆升嘅林峯做嘉賓。Sammi介紹佢出場時話︰「今晚呢個Bonus就厲害啦,我驚你哋開心到拆天。呢位嘉賓最近着火呀,好Hot!總之我細細個就睇佢嘅戲長大啦!」
兩人手拖手合唱《愛在記憶中找你》,Sammi感謝林峯百忙中抽空擔任表演嘉賓,林峯問Sammi網上流傳嘉賓名單,點解今日係「待定」?Sammi即刻澄清︰「梗係唔係啦,假㗎!」林峯又發現Sammi噚晚演唱會名單唔簡單︰「我仲睇到個名單有『龍捲風』,即係古天樂,其實你好多次演唱會都請佢嚟...」Sammi就話︰「假㗎,佢話唔得閒喎﹗」
林峯喺《九龍城寨之圍城》片中因為一碗叉燒飯開始城寨故事,Sammi特意送上一大碗叉燒飯畀陳洛軍,呀唔係,係林峯!林峯高舉叉燒飯跟觀眾打招呼:「大家好,我係『陳洛軍』!」Sammi話林峯喺呢行演藝生涯都係有血有淚,呢碗叉燒飯食落去都真係滋味在心頭!
林峯之後獨唱《愛不疚》,喺台上遊走同觀眾握手,佢話:「我上一次喺紅館唱歌都幾年前,其實我出年都有機會重返紅館!」佢離開前同大家約定「我哋出年紅館見!」