【Viu】Sammi鄭秀文紅館演唱會，昨晚（13日）第二場有林家謙做嘉賓。家謙以「白色小飛鳥」造型亮相，二人以「表姐」同「表弟」相稱，Sammi話唔好意思，去年請咗家謙一次但「撻Q」，好彩今年再邀請對方仍一口答應，Sammi仲即場邀歌，好識把握機會呀！
呢位「表弟」好乖巧，送咗「唔係好貴重」嘅《Inside Out》盲盒畀「表姐」，完美配合Sammi首新歌《盲盒》，家謙話：「我哋每個人每一日瞓醒都好似抽盲盒，因為遇到嘅事情、情緒都預計唔到，無論抽到阿樂、阿怒、阿尷都好，都希望你好好擁抱每種『腦朋友』。每種情緒都可以令我哋感覺到自己嘅存在，然後好好咁過每一日。」Sammi大讚：「講得好好，多謝表弟！」
Sammi即場拆開，搞笑地將包裝紙丟喺地上，家謙連忙逐一執拾，全場大笑。結果Sammi抽到紅色「阿燥」，家謙笑話：「啱晒你啦，你頭先咁樣！」然後學佢丟垃圾紙喺地上。Sammi即刻變乖自己執返，真係一場好好嘅身教。之後二人演唱Sammi經典金曲《衝動點唱》，仲改咗一句歌詞變成「原來是我衝動翻唱」添！
Encore 環節，Sammi換上白色小背心，連唱三首歌仍活力充沛，笑言追隨多年嘅粉絲年紀變大，嗌「encore」和「Sammi」嘅聲音都變弱，叫大家多做運動，大騷結實「老鼠仔」，好得戚咁話：「睇唔出我就嚟52歲？犀利？應承我，一齊變老，好唔好？」全場觀眾大叫「好」！
完騷後，Samm返酒店休息時拍咗段短片，透露15日會休場一天，雖然好攰，但仍會睇返自己演出！而今場有張衞健、導演谷德昭、溫碧霞與丈夫何祖光、少爺占等捧場，想睇更多Sammi精彩表演，即刻去片！
