【viu】Sammi鄭秀文正喺紅館舉行「You & Mi 鄭秀文世界巡迴演唱會2023」，噚晚19日第六場，當Sammi回顧過去十次入圍但落選金像獎影后嘅電影歌曲同感言時，觀眾席上嚟捧場嘅GiGi梁詠琪都感動落淚。而呢晚表演嘉賓有Stephy鄧麗欣，兩位女神合唱《親密關係》，唱完Sammi笑指Stephy有新封號：「你依家叫『蜜桃臀』喎，咁勁嘅，係咪執過嚟？（我要學你嘛！）我邊有？我巨臂、我大隻之嘛！（我練錯咗地方）！」台上台下都大笑！Sammi仲準備咗一串自己親手整嘅水泡餅頸鏈俾Stephy，幫佢戴上：「係咪好有心思？我親手揀、親手串，搞成晚架啦！」Stephy好欣賞咁話：「中間有窿嗰啲特別好食架！」最近復出樂壇嘅Stephy得到Sammi鼓勵，最後演唱《不要離我太遠》。呢晚完騷後，Sammi走出紅館同歌迷打招呼同簽名，講埋晚安先走，好sweet。
而之前17日晚第五場嘅嘉賓，係「第42屆香港電影金像獎」「最佳原唱歌曲」得獎電影《填詞L》主題曲《填詞魂》作曲兼主唱者謝雅兒。雅兒出場即嗌：「阿媽，我得咗啦！」全場歡呼。Sammi攬住佢覺得佢緊張到震，於是鼓勵同安撫佢：「唔使驚，大家都會支持你，每個人都有做過新人嘅階段，每個人都需賈被肯定、被認可，今晚舞台就同你分享，希望你盡情展現自己。」二人合唱《默契》。之後雅兒激動多謝Sammi提攜：「我細個屋企比較窮，只收藏一隻唱片，就係Sammi嘅《終身美麗》。我媽媽依家應該喊晒！」Sammi就話睇金像獎頒獎禮見佢攞獎好感動：「我哋都係追夢、都係夢想成真嘅人，所以唔好放棄！」之後雅兒獨唱《填詞魂》時，觀眾大叫「加油」。
而呢兩晚嚟捧場藝人朋友包括佘詩曼、陳健安、何嘉莉、陳嘉寶、森美、吳嘉熙、KOL薑檸樂、梁詠琪GiGi、馮允謙、雲浩影、劉沛蘅同ANSONBEAN等。
