【Viu】Ian陳卓賢一連七場亞博演唱會，每晚都邀請唔同嘅唱作人做嘉賓，噚晚（23日）第五場就有Yoyo岑寧兒 。Yoyo同前一晚嘉賓Serrini成個feel好唔同，說話唔多，所以Ian趁Yoyo上台前，就已經幫手同Hellosss打底：「如果一陣我哋啲talk靜晒、dead air，即刻掌聲好唔好？一dead air就掌聲。」之後仲全場預演一次，效果係超成功、超爆笑！
二人揀咗《如果我是一首歌》合唱，唱完正準備入talk位嗰陣，全場Hellosss聽見有「吉位」就醒目即刻喪拍手，搞到Yoyo都不禁起疑心笑話：「咦，咁好嘅⋯」然後就問Ian：「其實我哋⋯唔係好熟啦⋯你仲記唔記得我哋第一次有任何對話，或者交流講嘢係幾時？」當陳仔努力回想嘅moment，Hellosss又再使出拍手大絕！陳仔再表示：「我哋⋯好似冇⋯」Yoyo搶答：「今日晏晝！」被突破盲腸嘅陳仔驚醒：「所以我哋唔係唔熟，我哋⋯」講到呢度，二人勁有默契接：「係唔識！」呢段咁有「營養」嘅對話，真係就算聽幾多次都會爆笑！
陳仔再話依家可以透過音樂認識Yoyo，而Yoyo就再帶出打機都可以識朋友呢個topic，點知以前打機、但依家唔打機嘅陳仔意外地終結咗呢個話題，全場又再次哈哈大笑！最後Yoyo衷心恭喜陳仔終於開到個人演唱會，並祝福對方：「離你理想中音樂人嘅形狀，每一日都越嚟越近。」陳仔鬼馬扮風回應：「咁輕輕的我就好似風咁，我依家飄走，然後交個台畀你！」
