【Viu】Ian陳卓賢首個個人演唱會《IAN CHAN“TEARS” IN MY SIGHT SOLO CONCERT 2024》，昨晚（22日）第四場有樹妮妮Serrini做嘉賓。呢個「樹熊組合」真係估佢唔到，Serrini喺台上多次出言「調戲」Ian，搞到Ian有啲招架不住，紅都面晒，爆笑連場。
Serrini 跟住Ian叉腰，笑話：「我見到啲靚嘅男仔，就不其然會MIRROR咗你啲動作。」之後又出手篤「真空」Ian胸口實測有幾hot！Serrini仲自爆佢哋平時嘅溝通方法：「外邊觀眾唔知Ian好喜歡Serrini！佢喺頒獎禮後台見到我就『吓』，我勁開心，我哋唔用聲音去講嘢，『吓』好快要走，我好鍾意我哋嘅交流方式，好安靜。你知唔知好危險，你呢啲I人，畀咗cue我哋啲E人，係停唔到㗎！」
Serrini一路講，Ian就一臉怕羞掩嘴狂笑，之後佢哋爆咗一次「約會」經歷。Serrini繼續出招，突然踏前一步走近Ian，嚇到佢即縮，突擊成功嘅Serrini超開心：「我好貪玩，見好靜嘅男仔令佢哋笑同面紅好開心，突然行前面佢就驚。」Ian有晒心理準備話嚟多次都被嚇退，最後Serrini玩足三次：「本能反應，勁好玩！而佢唔係扮出嚟，好cute囉！」全場hellosss嗌到拆天，Ian man爆澄清：「我男子漢，唔係cute！」想睇更多熊寶寶Ian有幾得意可愛，即刻睇片！
