【viu】卓韻芝睽違5年，噚晚重返棟篤笑舞台，喺戲曲中心舉行一連五場全新獨腳戲《芝姐災難大全》。全晚有冰有火，有笑有淚，講自己身為中女離婚，又以西洋棋局比喻呢段婚姻。然後同Fd出走冰島睇火山爆發，點知遇到嚴重車禍收場。
阿芝更重提當年自殺事件，指已係18年前嘅事，嗰段期間佢拍咗3部電影、做咗5套舞台劇、7個棟篤笑、寫咗14本書。阿芝慨嘆到今時今日，仍被稱為「自殺嗰個明星」，佢奉勸觀眾：「我嘅事業已經無法突破呢個高點喇！所以大家千祈唔好自殺，因為自殺係會抹去你之前、之後嘅所有嘢，你係breakthrough唔到㗎！呢個就係珍惜生命嘅唯一原因！」
謝幕時阿芝先感謝恩師俞琤，再感激美指前夫梁子賢為佢設計咗3款紀念品，仲拎住其中一件「求其撳心心」羊Tee 甜笑話：「好多謝佢，佢啲嘢好靚㗎！」今次嘅票價最高去到$1,888嘅「我愛芝姐門票」，阿芝感謝有人買：「佢哋畀咗呢個高昂嘅價錢去純粹表示愛意，係冇任何回報地付出，多謝晒！」然後再發現其中一位買貴飛人士竟然係顧定軒。
而噚晚嚟捧場嘅名人包括俞琤、林海峰、張叔平、謝安琪、張繼聰、陳健安及顧定軒等。
