【Viu】Gigi梁詠琪嘅《時間遇上我們巡迴演唱會》日前重新啟航，2024年首站噚日喺澳門舉行，為fans送上雙重福利，除咗訂製一套全新嘅大露背歌衫，演唱期間Gigi更走到台下同fans握手，全場隨即陷入瘋狂狀態！
適逢個唱喺Gigi 47歲生日（25日）前夕，演唱會秒變大型生日會，更有fans高舉印有「生日快樂」嘅應援手幅！點知好戲在後頭，西班牙籍老公Sergio同囡囡Sofia驚喜現身舞台，帶領全場fans大合唱中、英版生日歌，Sergio更負責獻花，一直被蒙在鼓裏嘅壽星女，收到呢個birthday surprise，感動到眼濕濕！佢又搞笑問囡囡緊唔緊張？Sofia笑話：「A little bit！」Gigi即刻送上擁抱以作鼓勵，同時亦怕醜用花遮面咀嘴老公，兩公婆又攬又錫幾次，甜到漏呀！
壽星女指能夠同屋企人、fans一齊預祝生日好開心，感謝屋企人就好似天使咁，令佢嘅人生變得唔一樣、唔再孤單，佢仲要阿囡現場翻譯比老豆聽，過程好搞笑！事後Gigi受訪笑話一早估到fans會唱生日歌，但就諗都諗唔到Sofia會當住成萬人面前上台唱歌，覺得囡囡真係長大，好勇敢！對有冇機會兩母女喺個唱上合唱，Gigi笑話要交返畀囡囡決定！巡唱下站將空降台灣小巨蛋，亦係Gigi首次攻蛋，佢話一啲都唔緊張，反而好期待呢個新挑戰！
