【Viu】環球唱片今晚喺會展舉行《想 張國榮20周年致敬音樂會》，紀念已故一代巨星「哥哥」張國榮逝世20周年。打頭陣先有「黎天王」黎明帶嚟《當年情》、《明星》同《為你鍾情》三首經典金曲，貫徹「省話一哥」性格，佢臨離場只講一句：「多謝在座今晚嘅來臨。」
緊接有晒長腿同美背嘅GiGi梁詠琪出場，佢獻唱《側面》同《寂寞夜晚》，又大讚哥哥係位不可多得嘅藝人、風度翩翩又心地善良，為電影、音樂界作出好大供獻。久未喺台上獻唱嘅Kelly陳慧琳，演繹哥哥嘅《誰令你心痴》、《柔情蜜意》，期間Kelly分享曾去過哥哥喺加多利山屋企，有幸獲哥哥教做戲，但遺憾冇得同哥哥喺幕前合作。
