【Viu】宇宙天團ERROR為慶祝成軍五周年，肥仔梁業、何啟華Dee、郭嘉駿193及吳保錡Poki推出新團歌《四五成群》，仲邀請咗300 Fans一同拍攝MV，場面墟冚！
《四五成群》由陳考威、黃兆銘作曲，梁栢堅填詞，旋律溫馨，但歌詞就寫盡ERROR四子之間最赤裸嘅兄弟情，就連去廁所、發脾氣等內容都有，十分到肉，至於邊句講邊個，大家都表示唔開名，聽到邊個唱，就一清二楚嘞！至於點解要搵梁栢堅填詞？咁就要睇片等四子親自講解。
MV方面，佢哋想搵一個舞台，又坐到觀眾，最後阿Dee選擇咗充滿情懷嘅寶石戲院，佢好坦白咁話：「五年前我哋Call唔爆一間戲院，而家幾間都應該可以，所以都要同大家講聲，I Love You Guys!!」
除咗Fans加入拍攝，今次四子嘅造型都花咗唔少心思，西裝上加入咗大家喺《全民造星》時嘅參賽號碼繡章，勾起咗好多辛酸又難忘嘅日子，但估唔到呢啲號碼都係神預言佢哋嘅命運！包括Poki嘅「58」、Dee嘅「74」、193嘅「26」同埋肥仔嘅「45」，究竟係點解讀呢堆數字？而四子平時成日亂講嘢，其實都有啲心底話，想趁五周年分享一下，快啲loop爆條片聽多幾次！
另外，《四五成群》原定今晚9點喺Youtube直播，但ERROR再一次遇到Error，YouTube 首播都中bug，延遲咗成半個鐘先上架，fans等待期間，保錡同Dee就入去直播留言陪fans傾住偈等，Dee笑話：「故意嘅，想引到成千人上水」、「變成最大首播討論論壇」，保錡留言：「
YouTube 壞第一次見我咁大個仔」、「如果美國時間要12個鐘後」,十分搞笑！
