【Viu】台灣金曲獎歌后Tanya蔡健雅噚晚(25日)完成紅館演唱會，鄭中基、Stephy鄧麗欣同Zeno顧定軒、岑寧兒、藍奕邦同老友鄧小巧都有嚟捧場！而爭取唔到上台做嘉賓嘅小薯茄朱Mic同肥蚊，亦喺台下做觀眾。
演唱會開場，Tanya身穿露肩仙氣長裙，拎住結他登場，跟手唱《Bluebirds》 、《失語者》 、《Break Down》，只係唱咗3首歌，台下已經拍爛手掌！Tanya之後以廣東話同大家打招呼，仲表示：「我終於飛到紅館啦！」其實9年前嘅6月26日，本應係佢首登紅館開騷嘅大日子，但偏偏個天好似同佢開玩笑，當時佢身體狀況出問題，導致演唱會要取消，事隔9年終圓夢踏上呢個舞台，難怪Tanya都感觸話等咗好耐！而喺呢9年裡面，Tanya都有好多變化，佢學識咗種花、養貓、整甜品、針織、後空翻，觀眾一聽到後空翻，即以掌聲要求要睇表演，不過Tanya就話呢啲才藝，冇諗住喺現場演出，大家請放心，真係笑cry！同大家分享完心情後，Tanya繼續以歌會fans，唱出 《半途》、 《無底洞》。
喺Encore環節，Tanya就唱出Eason嘅《十年》，唱到副歌時，仲轉Channel唱廣東話版《明年今日》添，全場即刻尖叫啦，Tanya仲謙稱呢首歌練咗10年，仲講，去片啦！
