【Viu】麥沛東同楊偉倫今年憑住電影《正義迴廊》，齊齊入圍第41屆香港電影金像奬最佳男主角獎，兩兄弟爭做影帝，諗返起宣布入圍名單當日，麥東話心情好似坐過山車咁緊張，而阿卵就話成件事好夢幻，用咗半日時間先消化到！雖然今次入圍角逐最佳男主角嘅其他對手，好似劉青雲、黃秋生都係影帝級人馬，然後就係同樣畢業於演藝學院嘅師兄張繼聰，麥東同阿卵都話係越級挑戰，雖然佢哋覺得贏面唔算大，不過信心就一定要有嘅，麥東仲幻想同阿卵封雙影帝添！
其實無論電影最後攞唔攞獎都已經贏盡口碑，亦令到佢哋兩位多咗人識，阿卵仲話而家出街多咗人搵佢影相，麥東都接多咗廣告，不過最開心都係多咗人搵佢哋拍戲，麥東仲話自己嘅終極目標係闖荷里活演超英電影，解鎖自己嘅終極理想！
