【Viu】電影《正義迴廊》上映7周勁收3500萬票房，導演何爵天與台前幕後到尖沙嘴慶功，阿卵楊偉倫竟然遲大到，嚟到嗰陣仲成面出晒汗，自嘲好似啱啱殺完人咁。麥沛東、邵仲衡、莊韻澄、鄧月平、蔡雪瑩、龍志權同盤菜等都有到場，齊齊祝酒贈慶。
導演、阿卵同麥東好多謝香港觀眾嘅支持，亦都好感激傳媒幫手宣傳，導演話希望票房可以衝破4000萬，嚟緊《正義迴廊》仲會喺美加、歐洲等地上映。麥東話希望套戲可以去埋南極同非洲上映添。嚟緊17號結婚就麥東，就話因為防疫關係請唔晒台前幕後去飲，現場有人提議佢直播洞房，麥東話：「下？正義洞房呀？」
另外，鄧月平話一早已經知道《正》嘅水準，至少會超過3000萬票房，佢又承諾大家，如果票房超過5300萬，佢就Po自己極樣衰嘅相上網。鍾雪瑩話會跟機Po樣衰相：「總之阿平做咩，我就跟機。」佢哋話而家等緊有眼光嘅導演搵佢哋拍戲，又搞笑話自己聖誕可以唔放假照開工。
