【Viu】宇宙天團ERROR個唱噚晚舉行尾場，吸引半隊MIRROR同P1X3L 捧場之外，仲有肥仔女神Stephy，同埋Dee哥女神雪雪、《毒舌大狀》團隊、葛民輝等，星光熠熠呀！雖然鏡仔大駕光臨，但ERROR都盡情叫MIRROR收皮，嘉賓小肥仲自爆當年拍《全民造星》，鍾意B組多過A組，激死MIRROR呀！
最驚喜莫過於古Sir做特別嘉賓，同ERROR合唱《勁歌金曲》，將九展變K房！古Sir表示係為Do姐、子華神、張家輝同老婆做嘉賓，希望四子出返首串燒歌去總結當今樂壇，仲承諾會幫ERROR做監製，係愛呀！
ERROR最終唱到近12點半先完騷，受訪時笑談超時罰款，仲撻「九展天團」同「九龍灣蘑菇獸」朵嚟搲折頭。佢哋又話同大星古Sir合作後，終成為真正歌手，終極目標係齊齊上叱咤攞獎！
