【Viu】宇宙天團ERROR一連四場九展騷噚晚開鑼，宣萱、姜皓文、廖碧兒、駱振偉、冰姐、媚姨、《戀講嘢》拍檔郭奕芯、浩南同Helen等捧場。ERROR甫開場就連唱4首金曲，包括《404》、《我們不Chok》、《我們很帥》、《我們不碎》，緊接有「頭腦擔當」Dee哥以「明星生活」為題「講經」，仲即席喺台上由女Dancers幫手換衫除褲！四子仲喪到逐個MIRROR成員嗌佢哋收皮，又起鬨叫全場觀眾嗌ERROR收皮，事關有Haters先代表係星咁話！
輪流Solo時，保錡自肥邀請女神Heidi合唱《猥瑣》；33就自爆開騷前中招，要打類固醇針開聲，獻唱新歌《越州公路193》時又感動落淚。肥仔就化身「九龍灣城城」跳唱，Chok爆！特別嘉賓Joyce鄭欣宜登場仲自綁蝴蝶結扮禮物，要四子拆開佢，又讚Dee哥最靚仔；保錡最唱得；193最大隻；肥仔最似男朋友。
Encore時，ERROR憶述3年前喺麥花臣開騷前，只賣出8成門票，要冚黑布遮位，估唔到今時今日可以開4場九展騷，但希望歌曲嘅點擊率可以高過港普訪問，仲笑言想出港普歌添，有得諗喎！
