【Viu】宇宙天團ERROR噚日(2號)4歲生日啦！適逢成員193嘅自家品牌同商場有聯乘活動，有「老婆」就趁呢個大日子去交家用啦！專登請假朝聖嘅丸皮課金4位數字，搞笑呼籲：「多啲嚟呃我哋錢啦！」佢仲勁幸運首次抽中有「老公」33親筆簽名嘅post card，難怪笑話要過膠收藏！幸運嘅又點止一樣，佢仲撲到ERROR喺月中舉行嘅九展騷添！
至於老婆Z、老婆A、C都有斬獲，喺度祝ERROR生日快樂，四位一體再行遠啲，笑話只得佢哋4個先會有呢種特別嘅化學作用，仲希望ERROR會有40、80歲咁喎！支持咗33有3年嘅佢哋，大讚「老公」雖然一出道就近乎完美，但唔需要滿分，因為要有進步嘅空間。講到早前33喺節目《ERROR自爆96小時》爆喊，佢哋話睇到都心痛，希望大家見到33更真誠嘅一面、消除之間嘅誤會。
而保錡嘅Pokimons亦喺旺角舉辦一年一度嘅市集，派發大佬應援物之餘，仲有福袋賣添，好運嘅可以得到大佬嘅親筆簽名㗎！另外仲安排咗LED廣告應援，賀四子牛一添，認真Sweet啊！
