【Viu】張敬軒今日出席健康食品活動，被同場米雪笑稱「軒公」即刻怕醜仔上身，做訪問嗰陣笑指要洗甩「軒公」之名，希望大家叫番佢做「軒仔」，事關就連老闆楊生都咁嗌佢，真係聽到都腳軟！
講到佢個跨年騷聽日優先訂飛，佢話有少少緊張，又自爆每次開騷都會有happy problem，就係次次都因為訂飛問題同父母鬧交，而今次家屬飛仲比以往少添！提起「樹林黨」Serrini、林家謙自薦幫拖，軒仔貼心安排娛樂大使、唱歌老師呢兩個筍位畀佢哋。
另外，軒仔首度孭飛做男一嘅新戲《超神經械劫案》，日前已經煞科，佢透露睇試片覺得好好笑，特別係洪嘉豪、Jeffrey完美咁將「中二病」發揮到極致！講到Jeffrey同楊天宇連環受傷，軒仔指佢哋要做新一代武打巨星，幸好片場有駐場救護員，又自爆被Ivana王菀之「投訴」踢瘀咗佢添！
