【Viu】電影《深宵閃避球》講述一班邊青少女包括Dee姐陳海寧、鍾雪瑩、Cloud雲浩影、Feanna黃淑蔓等等，喺鄭伊健飾演嘅劉Sir帶領下逐步變成熱血少女。其實呢個「粉青」閃避球球隊一啲都唔揸流攤，佢哋之前仲接受過地獄式訓練，務求練到自己唔驚個波！正所謂三個女人一個墟，套戲九個女仔成日圍埋一齊，有時會傾吓少女心事同埋音樂，而鍾瑩同Cloud就喺期間完成咗一首歌曲喇！8個妹妹仔見到伊健就心心眼，一齊度咗段舞送俾男神，佢哋仲爆伊健好好唱口，每日都會唱唔同嘅歌自娛。戲中嘅邊青少女個個都有鮮明嘅形象，好似鍾雪咁就染咗粉藍色頭，演一個男仔頭；Dee姐就要「壞過凱婷」，挑戰食夠兩支！而阿Cloud就飾演一個社工，帶咁多位姊妹返正途。至於Feanna要飾演一個可愛肥妹仔，但本身就係瘦底，佢話要諗點樣增肥都幾頭痕㗎。
