【Viu】由古天樂監製兼主演嘅科幻電影《明日戰記》最新票房衝破6625萬（票房數據來源：Hong Kong Box Office Ltd.），超過票房6624萬嘅《寒戰II》記錄，榮登香港電影史上華語片票房第一位，恭喜晒！一收到呢個好消息，三位主演古仔、劉青雲、「黑仔」姜皓文等即刻開香檳慶祝，古仔話得到咁多位觀眾支持好感動，希望向住7000萬票房衝落去，攞到呢份最好嘅生日禮物；青雲表示近年嘅港產片得到大家嘅支持係好嘅開始，並承諾一破7000萬大關就會再嚟謝票兼慶祝老友生日，又自薦為動漫前傳配音；黑仔就話得到呢個「第一位」好驕傲，希望港產片愈行愈好！
而喺今日晏晝，古仔孖住青雲去到戲院謝票，分享電影創作過程，青雲仲自爆兒時夢想係做太空人添！而古仔終極預告會再有刪剪片推出，另外，問到有否留意黃秋生、林家棟同張繼聰被提名金馬影帝？古仔笑住帶過：「唔係《明日戰記》唔答，多謝晒！」
