【Viu】由鬼才韋家輝執導嘅新片《神探大戰》21號已經上畫，韋生今次嘅身份係編劇同導演，靈魂人物一定非30年老拍檔劉青雲莫屬喇！韋導已經十幾年冇個人執導演筒，今次非常破格拍一部唔係韋家輝作風嘅戲，拍攝《神探大戰》折磨自己嘅同時亦辛苦青雲呢位神級拍檔，有時甚至去到現場先知拍咩場口。至於湯怡就飾演一個有特別背景嘅督察，面對連場嘅動作戲，佢覺得有新鮮感又有挑戰；今次韋導仲用咗大批新生代演員，見到年青人表現出色佢都覺得好欣慰，提到飾演反派領軍人物嘅Jeana何珮瑜，為咗呢套戲要剷青加漂頭，仲要剃埋眼眉，韋導同青雲都話同佢哋印象中嘅Jeana完全唔同呀！
