【Viu】鬼才韋家輝同劉青雲呢對老拍檔又返嚟喇！由韋導親自編劇兼執導嘅《神探大戰》噚晚舉行首映禮，主角之一嘅林峯同蔡卓妍雖然缺席，不過有劉青雲同有份演出嘅湯怡撐住個場，都夠照啦！韋導同劉青雲喺電視年代已經合作，足足超過30年啦！基本上對方趷起條尾，已經知另外一個諗咩啦！韋導話好想拍《大時代》電影版，但佢堅持話：「總之青雲就一定係方展博嘅不二之選。」熱血、樂天嘅方展博由青雲做當然冇得輸，不過小編最有興趣丁蟹會唔會重演掟仔落街呢幕經典場口呀？青雲仲大讚拍檔阿Sa係不可多得嘅動作女演員添呀！
噚晚戲院真係熱鬧，包括出爐影后劉雅瑟、張敬軒、大哥大洪金寶、杜琪峰、姜皓文、英皇老闆楊受成伉儷、吳浩康同臨盆在即嘅老婆郭思琳、許靖韻等都爭相嚟睇好戲。Deep同老婆Margiela一齊接受訪問，Margiela大讚老公喺佢大肚期間照顧周到，Deep笑言：「係咪發覺我喺多人嘅地方先對你特別好呢！」之前Deep話過會親手為BB剪臍帶？咁依家呢？佢話：「總之產房就一定入，但我又有啲驚，驚剪親BB。」喂呀唔是縮呀嘛！
