【Viu】「宇宙天團」ERROR噚晚現身電影《七人樂隊》嘅星光場，做訪問嗰陣例牌大放笑彈，正當大家都戥肥仔喺《I SWIM》錫唔到女神袁澧林唔抵之際，佢自爆螢幕初吻一早獻出，對象仲係193、仲要係法式濕吻，係咪即刻好有畫面呢？而嚟緊9月佢哋就會參加明星籃球賽，獲得籃球傳奇巨星高比拜仁（Kobe Bryant）嘅24號球衣嘅肥仔大叫有壓力，阿Dee即刻幫兄分起朵叫「MakerVille Kobe」，又抵死獻計攞分：「四個輪流換裁判衫控制賽果！」唔係先話唔出貓咩？
同場有近年轉型做KOL嘅「鏡粉」李司棋，有冇考慮出山同偶像Anson Lo合作拍戲先？佢自嘲做得人嫲嫲，硬係覺得格格不入，但如果劇本好都ok，冇話落閘！至於講到司棋姐最近同張敬軒拍廣告請對方食拿手茶燻雞，佢話就連陳法拉都好恨食呀！
