【Viu】Jay Fung馮允謙自開完處男騷後keep住開工冇停手，今日就去到珠寶店做一日店長兼頒獎嘉賓，更即場獻唱冧歌送一對新人，sweet到呢！笑問Jay Fung做店長介紹戒指嗰陣有冇諗起自己買求婚戒指嘅時刻？佢抵死笑話冇，因為好驚講錯資料，反而係有啲壓力，好彩最後都順利完成，仲自讚好有potential添！
原定兩年前結婚嘅Jay Fung，因為疫情延期，問到落實咗婚期未？佢指疫情之下有好多嘢要兼顧，啱啱開完騷會再着手處理，但結婚戒指就要再努力儲錢買。另外，講到媽媽星期一生日，Jay Fung話媽媽難得由加拿大飛香港撐佢開騷，要準備大禮，除咗諗住即場揀禮物之外，仲會訂生日蛋糕、請媽媽做facial，真係好有孝心呀！
