【Viu】「唱作王子」Jay Fung馮允謙近日推出sweet爆情歌《給你幸福 所以幸福》，講述找到對的人嘅幸福甜蜜！喺MV入面Jay飾演一位婚禮歌手，官仔骨骨咁着住套西裝自彈自唱，仲邀請好兄弟兼音樂朋友組成樂隊作現場演出，Jay特意感謝好友們嘅付出：「阿一好好，佢預備咗呢首歌嘅樂譜，執晒成首歌特登去彈，花咗好多努力同心機。」
MV除邀得同門嘅Evelyn客串演出，終極另一彩蛋就係Louisa麥明詩驚喜現身，飾演同Jay同甘共苦嘅女朋友，有幕二人情深擁抱又互餵嘢食添！Louisa直言好開心可以同Jay合作，仲自爆為對方獻出「第一次」：「今次係我第一次拍MV，我嘅第一次畀咗你，希望你拍得開心！」Jay解釋邀請Louisa參演嘅原因：「答案好簡單，有邊個唔想邀請麥明詩拍MV？我好幸運邀請到你，你係一個好真誠、好sweet嘅女仔，好啱MV嘅角色。」
Louisa喺MV入面睇住自彈自唱嘅Jay，唔使兩分鐘就感動到淚流滿面：「你唱嘅歌詞好觸動到我，有一句係『完美的結尾曲』。有個男人願意畀我做佢嘅結尾曲，真係好感動，如果我有呢一日就好啦！」
